بمناسبة ملحوظات سها حمام عن الحياة في أمريكا.. هو نفس الكلام في ألمانيا مع كم ملحوظة..
- حبل جرس الأتوبيس الأمريكاني اللي بينبه السائق للي عايز ينزل تطور لزر اليكتروني في الأتوبيسات الألمانية
- الألمان مش زي الفرنسيين قعدة مكتب و شياكة .. هتلاقيهم في النقاشة و السباكة و التصلحيات و كل المهن تقريبا
- كل حاجات البيت بيشتريها الألماني قطع مع كتيب إرشادات للتركيب و يشتري معاها المفكات و المفاتيح و كل أدوات السباكة و النجارة و الكهرباء .. الكلام منطبق على غرفة نوم أو مطبخ أو جهاز كهربائي٬ المصري بتفقد جيناته هنا فعاليتها تقريبا .. و بتتحول في طفرة محمودة لجينات ألمانية٬ لأن أجرة التركيب أغلى من الحاجة نفسها
- المجاملات مفهومها مختلف .. كان الاستغراب بيملأ المكان لما أنا و أصحابي بنتخانق مين يحاسب .. زميلة إيرانية حكت لي إزاي حست بالإهانة لما راحت تأكل مع خطيبها لأول مرة و حاسب لنفسه بس.. ماتياس رد عليها بس أنا اتعلمت الدرس و بقيت أحاسب لنا الاتنين من ساعتها
- الألماني محافظ جدا لدرجة تصل إلى حافة البخل.. هيدور على توفير السنت طالما توفر.. لكنه لن يبخل على نفسه في التجهيز لأجازته السنوية أو شراء سيارة أو عجلة و خلافه
- المصري بيعزم أصحابه على ما لذ و طاب و المائدة تكفي أضعاف المدعوين و الألماني سيأكل بامتنان و شراهة.. لكن بلاش تزعل لما تزور صديقك الألماني و تلاقيهم مجهزين صنفين بالعدد و كمية محدودة بالكاد تكفي.
- لما تقول لحد كل معايا لو جعان هياكل من غير تردد .. مش محتاج عزومة مرتين٬ مش هيفهم الإصرار بكونه نوع من الكرم
- لو قلت لحد خد دي أو اتفضل هياخد الكلام جد علاطول .. المواقف الكوميدية في المنطقة دي لن تنتهي أبداََ
- كل طلب مصحوب بكلمة من فضلك Bitte و كل خدمة تؤدى بكلمة شكرا Danke
و مشتقاتهما اللغوية٬ دا مش متعلق بالاستلطاف أو الأدب .. دي ثقافة عامة
- مداعبة الأطفال باللمس حاسب جدا .. دا خطر
- المساحة الشخصية و المسافة الآمنة بين الأشخاص في ألمانيا هي الأعلى في العالم
- لما عربيتين يعملوا حادثة و لو تسببت في خدش بيركنوا على جنب من غير تبادل كلمة واحدة بذيئة و أحدهما يتصل بالبوليس و التأمين يتولى عملية الدفع ..
- للمتدينين جداََ٬ غض البصر المبالغ فيه من فتاة أو شاب مش هيتفهم كونه تدين أعتقد هيتفهم كنوع من الاحتقار.. للمتدينين العاديين: العناق بين الزملاء و الزميلات مسألة تحتاج لمرونة و توضيح و سيتم فهمه ببساطة ..
طبعا البوس و الأحضان بين الشباب ممنوع تماما .. التفكير بيروح هنا شمال .. في المسألة دي كلنا أصبحنا جميعا مشبوهين :)
- الخوف من القانون و التوثيق يصل لمرحلة الرعب عند الألماني.. المساحة هنا تقدر تواجه بها العنصريين بقلب من حديد
- صوتنا العالي في المناقشات بيبقى غريب في المواصلات و المحلات و الأماكن العامة .. مع الوقت هتلاقي نفسك تلقائيا بتهمس لجارك لحد ما تقابل مصري وافد حديثا فتنسى الموضوع .. مرة شفت في محل بنت مصرية بتزعق من آخر المحل لزميلتها على ماكينة الدفع .. أنا هناااااا استنيني.. و الناس اتكهربت من االدهشة أو الرعب مش متأكد تماما
- العرب كلهم لهجاتهم المحلية بتتكسر تماما .. كلنا بنتكلم لهجة عربية برلينية مطعمة بكلمات ألمانية
- الألمان قتمين حبتين .. مش هتلاقيهم مبتسمين كده و كول علاطول زي الأمريكان :)
Soha Hammam
http://ift.tt/1o0BdEv
via Tumblr http://ift.tt/1mVq8VN
ليست هناك تعليقات:
إرسال تعليق