يعنى نظرة على قائمة أصدقائك مثلا ثم نظرة أخرى على قائمة أصدقائهم هم .. هتلاقي متوالية التشابه الغريب في الأغلب..
الرغبة في تكوين جزر و أرخبيلات تتوزع حسب الاهتمامات المشتركة أحيانا.. و دا معقول إلى حد ما
لكن هتلاقي امتداد جزري بناء على الانتماء السياسي و العقدي و منه للموقف التنظيمي ثم الرؤية الوجودية للي بيحصل في مصر بين كونه ثورة أو انقلاب أو انقلاب نص نص.. ثم لمؤيد و معارض للانقلاب
ثم تضيق الجزر داخل بعضها ..
فالمؤيد بين مؤيد للسيسي أو معارض له ..
ثم تضيق أكثر لمؤيد للسيسي فلول و لا ثورجي ..
تضيق أكثر لكون مواطن الجزيرة مؤيد مصلحجي بسبوبة و لا هو كره الأخوان و خلاص ..
و تضيق أكثر هو كره الأخوان و لا إعجاب بسهوكة الجنرال و هكذا دواليك..
مجموعة الجزر التانية كمان ..
معارض علشان مرسي و للا للانقلاب في حد ذاته ..
ثم لو في حد ذاته هل الحل رجوع مرسي مؤقتا و لا انتخابات من الأول ..
و لو انتخابات من الأول.. ينفع الأخوان و لا بح خلاص ..
طيب لو بح خلاص يبقى المرشح لازم يكون إسلامي و لا يساري ....
كل ده في الجزر ..
كل جزيرة شايفة عالمها الخاص ..
جزيرة 1 : شعار واحد (في الغالب علامة رابعة العبقرية) يشدوا على يد بعض.. مرسي راجع بكرة و البشارات كتيرة ..
جزيرة 2 مرسي مش راجع و ربنا..
جزيرة 3..4..5 .... جزيرة 55
تمددت قائمة أصدقائي 5 أضعاف منذ انفجار ماسورة فيسبوك في مصر مع بدايات الثورة و اللي زادت انفجارا السنتين اللي فاتوا بشكل خلانا تاني أكبر مستخدمي فيسبوك في العالم..
قائمة الأصدقاء و المتابعين بتتغير جزرهم كمان حسب البوست اللي بنشره..
دا بدأ تقريبا مع خيبة 19 مارس (الخية اللي رحناها برجلينا حتة واحدة تقريبا .. فطلعنا منها 100 حتة متقسمة على فرعين .. إسلاميين متحجرين أو علمانيين ملحدين .. و ما بينهما)
لما واحد يضيفني عنده بعد بوست كتبته بحس بالهتاف: ياااه دا معانا .. يسلم فمك
و بتعاطف مع شعور الخيبة اللي بيجي له في بوست تاني: إيييه ما طلعش معانا .. دا طبعا إن ما وصلتش لخانة الأعداء
الملحوظة اللي مفروض معروفة إننا مش في عالم ما يطلبه المستمعون ..
المفترض أن كل واحد بيعبر عن قناعاته الخاصة .. مش لازم تكون متوافقة معك طول الوقت .. و القناعات دي أصلا مش ثابته و قد تنتقل من النقيض للنقيض ..
الأفكار تتطور دائما و تتغير أحيانا
ما عنديش مشكلة في أي صداقة افتراضية..
لكن بيغيظ جدا البروفيل اللي بصورة تعبيرية و أحيانا من غير صورة أصلا .. أو باسم مستعار ما ينفعش يبقى اسم طبيعي في شهادة الميلاد..
و كمان بلا أي بيانات و أحيانا بلا بوستات حتى .. طيب أضيفك إزاي أنا بأه ؟!
اكتشفت لاحقا أصدقاء من الواقع الحقيقي عاملين البروفيل الساحر بالمواصفات اللي فاتت.. و طبعا بقينا أصحاب فيس كما نحن أصحاب في الملح .. دي حاجه ما باليد منها حيلة
طبعا يظل الأصدقاء معارف الحياة الطبيعية رغم أننا ننتمي في بعض الحالات لجزر مختلفة تماما (لكت لي أصدقاء بلوك بعض بسبب المواقف الحادة و الإنفعال الآني)
المهم بكتب البوست دا ليه ..
انت ممكن تحدد هدفك أولا..
عايز فيسبوك تسالي و كده .. قشطة !! المزرعة السعيدة و صفحات الموضة مرطرطة على فيس
بس إذا كان فيسبوك بالنسبة لك منتدى للمعرفة .. للنقاش .. للتفاعل .. فيا ريت توسع دائرة نقاشاتك و مشاركاتك مع آخرين من جزر مختلفة.. لأن اللي بيحصل دا حرام و ربنا ..
مش معقول كمية التفاوت الرهيب ده بين الجزر المختلفة و كأننا من كواكب تانيه و مش من بلد المفروض واقعها السياسي و الاجتماعي واحد من ساعة ما الملك مينا وحد القطرين و جه الملك أعحا استلمها بمفتاحها و اللي لسه بندور عليه لحد دلوقتي ..
و مش هنلاقيه إلا بتكاتفنا قدر المستطاع و لو على القليل المتاح..
مصر أكبر من أتخن جزيرة فينا .. !!
Post by Abdou Alterkawi.
ليست هناك تعليقات:
إرسال تعليق